Intricacies of Friendship

Zindagi ki rahon me akela badh chala tha,
is jivant nanv se bhav-sagar ko paar karne chala tha,
path par kuch dost bane,
aage badha to doston ke kaafile bane,
doston me jaane kab kuch hamsafar kuch parvardigar bane,

Un ke saath guzaara waqt jeevan ke haseen palon me shumar ho gaya,
main is jeevan sangya ka kayal ho gaya,
kuch aur faasla tay kiya, kuch aur apni manzil ki ore badha,
ruka, mudha aur peeche dekha to sabka saath chhot gaya,
doston ke chhootne ka dukh mujhe todta chala gaya,
manzil ki ore badhte mere kadmon me thehrav ho gaya.

Har badhta pag maano sau man ka bojh ho,
kheench raha apne lakshya se das kos door ho,
saanse tutne lagi, aankhon ke aage andhera chha gaya,
shan bhar ke liye main bhootkalin ho gaya,
us kaali andheri raat ka bhay aaj bhi jhakjhor jaata hai,
halki si awaaz bhi sharir me bhukampi kampann paida kar jata hai.

Fir kahin si aati ek ujjwal kiran dikhayi di,
us me mano khuda ki murat dikhayi di,
laga khuda ka deedar ho gaya,
jeevan ka maksad jaise safal ho gaya,
us haseen chehre ki ore main barbas khincha chala gaya,
apni aakhiri manzil ki ore jane-anjaane kadam badhata chala gaya.

Manzil se kuch faasle par fir bhram toota,
laga aise nidra ka ek jhonka aaya ho jaise,
hosh sambhala to fir vohi nazaara tha,
jeene ki chah chhod marne ko bekraar tha,
pal bhar ko socha isi shan sharir tyag doon,
par manzil ko aakhri bar dekhne ka junoon havi tha,
nazar uha kar jab lakhsya ko antim bar dekha,
bichde hue saathiyon ko wahan khada paaya.

Unse milne ki khushi sharir me ek naya sanchaar kar gayi,
khatam hoti zindagi ko behaal kar gayi,
kuch is tarah mile hum ki manzil ko paane ki khushi fiki pad gayi,
mauj-masti bhari ruhaani shaam ki shakhsiyat bhoole nahi bhoolti,
chaha jo jeevan me sab kuch paa liya,
doston ki maujoodgi me khuda ko bhoola diya.